مرنے کے بعد کا منظر

 وہ اس دنیا سے تو رحلت کر گیا، مگر اگلے جہان پہنچتے ہی ایک عجیب سا مانوس سلسلہ شروع ہوگیا۔

ایک فرشتہ اسے خوبصورت، سرسبز باغوں کی طرف لے چلا۔ وہ ابھی منظر سے لطف اٹھا ہی رہا تھا کہ دوسرا فرشتہ نمودار ہوا۔ اس نے مرحوم کا بازو پکڑا اور راستہ بدل کر اسے اُن مقامات کی طرف دھکیلنے لگا جہاں دور دور تک آگ کے شعلے لپک رہے تھے۔

وہ گھبرا کر بولا:

“یار، زندگی میں بھی اتنا نہیں بھٹکایا گیا جتنا مر کر ہو رہا ہے!”

پھر اُس نے جھنجھلا کر کہا:

“بھئی، تم مجھے مار تو چکے ہو… اب مزید کیا مارو گے جو آگ دکھا کر ڈرا رہے ہو؟”

یہ بات منہ سے نکلی ہی تھی کہ اچانک تیسرے گروہ کے کئی فرشتے سامنے آگئے۔

انہوں نے قافلے کا کنٹرول سنبھالا اور سفر کا رخ دوبارہ ایک دلکش وادی کی طرف موڑ دیا۔

لیکن سکون زیادہ دیر قائم نہ رہ سکا - کچھ ہی دیر بعد چوتھے گروہ کے فرشتے کود پڑے، اور اسے تیسرے لشکر سے چھین کر ایک بار پھر دہکتی آگ کی سمت گھسیٹنے لگے۔

آخر وہ تنگ آ کر چیخ اٹھا:

“یہاں بھی وہی چکر! دنیا میں بھی مولوی، پنڈت اور پادری میرے ایک ہی عمل پر اپنی اپنی کتابوں سے الگ الگ فیصلہ سناتے تھے-

کوئی مجھے جنتی کہتا تھا، کوئی جہنمی!

بتاؤ، تم فرشتے ہو یا مذہبی فتوؤں کے ایجنٹ؟”

وہ اسی الجھن میں کچھ مزید کہنے کو تھا کہ

اچانک اس کی آنکھ کھل گئی۔ 

 

مزید ظلم یہ ہوا کہ بابا جی نے خواب کی ایسی تعبیر نکالی کہ رہی سہی کسر بھی پوری کردی۔

فرمایا: “پُتر! جنت، جہنم… اور فتوؤں کا یہ سفر مرنے کے بعد بھی تیرا پیچھا نہیں چھوڑے گا😏

 

اسجد بخاری 

جمعہ 21 نومبر 2025